Udas raatein hain

Udas raatein hain, khuwab saaray ujarr chukay hain
Hai aankh veeran k sab nazaray ujarr chukay hain

Meri zameen pe gulon k chehray jhulas gaye hain
Meray falak k wo chaand taaray ujarr chukay hain

Jo meray aansu shumar kertay, jo pyar kertay
Wafa k paiker, sabhi sahaaray ujarr chukay hain

Ab aankh darya mein koi toofan nahe uthay ga
Meri nigahon k sab kinaaray ujarr chukay hain

Tumhari shokhi gaye dinon ka hisaab maangay
Tumhein khabar hai k ghum k maaray ujarr chukay hain

Jo bhaid seenon mein thay kabhi, be_amaan huay hain
Jo raaz honton pe thay humaray, ujarr chukay hain

Ye waqt bhi khaa gaya hai kitni mohabaton ko
Qamar jawan thay jo yaar saaray, ujarr chukay hain...

.

Posted in: Ghazals